十一月十日

終於都攪掂左, 又少左一條光棍, 多左一個老襯.
回想起整個婚禮安排, 都係隨隨便便,輕輕鬆鬆 無精采節目, 無細心安排, 我亦沒有太投入其中, 一切都由老婆作主, 原本以為自己都無太大感覺, 畢竟同住七年, 大家已係老夫老妻. 但係在婚禮中簽紙的一刻, 突然間好感動, 因為我對另一個人作出終身承諾, 而佢亦願意將以後交托比我, 當時有一種通左電o既感覺. 原來一紙婚書係好奇妙, 好重要. 最開心就係姑丈上台獻唱, 雖然唔知佢唱乜, 但係感覺好溫暖, 同時又有好兄弟幫手打點一切, 呢個婚禮雖然簡單, 但係好有意義.
正所謂千世修來共枕眠, 兩個不相干o既人可以結成夫妻, 需要好有緣份先可以做到, 有時諗番轉頭, 如果以前是但一件事做左第二個決定, 我今日就唔會遇見佢. 就好似套西片Butterfly Effect一樣有唔同結局, 真係好奇妙. 前個星期報紙話香港離婚率好高, 話而家離婚係好普遍好平常, 副刊有D文章更講到離婚係解決問題o既唯一方法, 社會普遍接受云云. 兩個人之間發生問題, 有好多方法去解決, 用放棄態度去對待愛過o既人, 點解要去鼓勵, 接受.